කෑම වේලක් ස්පෙෂල් ගතියට හදනවා නම් නැතුවම බැරි “බටු මෝජු”

කෑම වේලක් ස්පෙෂල් ගතියට හදනවා නම් නැතුවම බැරි “බටු මෝජු”

කහ බතට, ලම්ප් රයිස් එකට වගේම සුවද සුදු බතටත් රස ගගුලක්…!

ලාංකික අපිට හොද මෝජු සංස්කෘතියක් තියෙනවා.
සිංහල අච්චාරැ කලාවෙන් ඉපදිලා මැලේ, පිකල් සංස්කෘතියෙන් රසවත් වෙලා හැදිච්ච මේ රසබර අච්චාරැ කලාව තමයි මෝජු කියන්නේ.

මෝජු කියන්නේ අච්චාරැවලට නොවෙයි.නමුත් අච්චාරැයි මෝජුයි සමීප රස සමානකම් සහිතවයි හැදෙන්නේ.

උත්සව අවස්ථාවකදී විතරක් නොව නෑ ගමනක් යද්දී හෝ මිතුරෙකුට දෙන්න බෝතල් කර අසුරා ලස්සනට පිලිගන්වන්න පුලුවන්.

අවශ්‍ය දේවල්

වම්බටු 500 g
රතු ළූණු 100 g
වියලි හාල්මැස්සන් 50 g
අමු මිරිස් කරල් 10 ක්
අබ මේස හැන්දක්
විනාකිරි කෝප්ප කාලක්
කුරැදු පොතු අගලක පමණ කැබැල්ලක්
සුදු ලූණූ බික් 2ක්
අමු ඉගුරැ අගල් භාගයක පමණ කෑල්ලක්
මිරිස් කුඩු තේ හැදි භාගයක්
ගම්මිරිස් කුඩු තේ හැදි කාලක්
කහ කුඩු තේ හැදි කාලක්
සීනි මේස හැදි 2 ක්
ලුණු රස අනුව

සාදාගන්නා ආකාරය

වම්බටු ටික අගල් එකහමාරක් පමණ තීරැ වලට කපාගන්න.
කපන අතරතුර කහ කුඩු ඉසින ලද බදුනකට කැපූ වම්බටු දමා කහ තවරා ගන්න.
ලුණු කුඩු එක්කල විට වම්බටු වල වතුර ගතිය වැඩිවන නිසා බැදීමේදී වෙලාව ගතවේ.එනිසා කහ පමණක් වම්බටු වල තවරාගන්න.
පොල් තෙල් කෝප්ප භාගයක් පමණ රත් කර වම්බටු ටික බැදගන්න.
රතු ලූණු ටික සහ අමු මිරිස් ටික තෙලට දමා තප්පර තිහක් පමණ බැදගෙන ඉවත් කරගන්න.
අවසානයේ හාල්මැස්සන් ටික බැද⁣ගන්න.
⁣වැඩි තෙල් ඉවත්වීමට සියල්ල සර්වියට් පේපර් එකක් මතට දමා පසෙකින් තබන්න.

අබ ටික වංගෙඩියට දමා විනාකිරි තේ හැන්දක් පමණ එක්කර අඹරාගන්න.
ලුණු කුඩු ,මිරිස් කුඩු,ගම්මිරිස් කුඩු,ඉගුරැ,සුදුලූණු,කුරැදු පොතු ටිකද එක්කර පේස්ට් එකක් සේ අඹරාගන්න.

මැටි ඇතිලියක් ලිප තබා විනාකිරි ටික සහ අඹරාගත් පේස්ට් එක එක්කරන්න.
මෙයටම සීනි එකතුකර මදගින්නේ රත් කරන්න.
සුලු වේලාවක් රත්කර ලිප නිවන්න.
කලින් බැදගත් බටු,රතු ලූනු,අමුමිරිස් හා හාල්මැස්සන් ටික මෙයට එකතු කර කලවම් කරන්න.

නිවුනු පසු ,පිරිසිදු වියලි බෝතල් වල අසුරා ගත හැකියි.

මෝජුවේ නියම රස මතුවෙන්නෙ දවසක් දෙකක් ගතවුණාට පස්සෙ බව අමතක කරන්න එපා.

චමීරා පතිනායක.

Please follow and like us:

Leave a Reply

Your email address will not be published. Required fields are marked *